خايفة احبه لايطلع زى اللى قبله

معتقدش ان لسه فى حد فى مجتمعنا مقالش الجملة دى

زمان كان فى قصة بيقلوها للعيال الصغيرة و هى ان طفل صغير كل يوم يجرى على ابوه و يقوله الحق يا بابا فى ديب بره و هياكل الخرفان يجرى ابوه مايلاقيش حاجة ... مره فى التانية و فى مرة فعلا كان فيه ديب بجد .. فالولد بيقول لابوه الحق يا بابا فى ديب بره و هياكل الخرفان فقاله لا انت كداب و مصدقهوش و الديب اكل الخرفان

ده نفس اللى احنا بنعملوا فى بعض، انتا ليه بتقلها بحبك و انت مش حاسس بيها .. و الخسارة مش انك هتجرحها بس .. لكن ان هى مش هتصدق حد تانى .. انت حرمت واحد بيحبها فعلا من انه يعيش مبسوط معاها

كلمة "بحبك"

بحبك دى يعنى مشاعر يعنى بتحبها و فى نفس الوقت مش عايز منها حاجة مش حاببها عشان جسمها حلو او بتفتخر لما تمشى جنبك ..
الكلمة فقدت معناها عشان احنا استخدمناها غلط ...
انت لازم تشوف حاجة حلوة فى الشخص هو نفسه مش شايفها عشان تبقى فعلا بتحبه
من غير ما تحب عمرك ما هتعرف تهدم الجدار اللى مابينك و مبين البنت ولا تتعودوا على بعض

انتو ليه مخبيين كل حاجة
متتكلمو مع بعض بصراحة
انت ليه عارف اننا اكتر المجتمعات جهلا فى الموضوع ده و مبتتغيرش
خلى عندك ضمير
خد موقف
فكر فيها و شوف انتا امتى هتبقى راجل .. هل هتبقى راجل لما تتراهن مع صحابك على واحده .. اللى يخطف قلبها الاول هتعزموه على بيج ماك؟!! هى دى الرجولة ؟
ولا الرجولة انك تفضل تحايل فيها لغاية ما تبوسها ولا حاجة و بعدين تخلع .. طب البوسة كان ليها طعم و انت مبتحبهاش؟

سيب نفسك و هتلاقيها .. هتلاقى اللى تحبك و تحبها و هتفهم ساعتها انك ماكنتش فاهم الحب صح .. اقولك على حاجة بدل ما تلعب ببنات الناس انزل دور على نصيبك

انا كتبت الموضوع ده لما حبيت .. لازم تفهم انك لازم تقابلها عشان تقلها بحبك .. مش تقلها بحبك عشان تقابلها .. لو فهمت الجملة دى احتمال يبقى فيه أمل